Me moton “Kthema Adresën”, shqiptarët e Luginës së Preshevës do të protestojnë sot në Medvegjë kundër diskriminimit dhe për të kërkuar rikthimin e adresave të pasivizuara.

“Protesta e caktuar e radhës në Medvegjë, më datën 3 nëntor 2024, me moton ‘Kthema adresën’’, është edhe kundër diskriminimit, në përdorimin e gjuhës shqipe, simbolit kombëtar, në investime e përfaqësime”, thuhet në njoftimin e organizatorëve.

Për pjesmarrje në këtë protestë, ka bërë thirrje Ardita Sinani, kryetare e Komunës së Preshevës.

“Në Medvegjë për të kërkuar drejtësi dhe për të rikthyer adresat e pasivizuara në mënyrë të padrejtë! Të mos lejojmë që qytetarët tanë të humbasin të drejtën për identitet dhe ekzistencë në vendin e tyre”, ka shkruar Sinani.

Ajo ka theksuar se kjo protestë është një thirrje kundër diskriminimit dhe në mbrojtje të së drejtës së çdo shqiptari për të jetuar me dinjitet në vendlindje./rtk